የኢትዮጵያ ኤሌክትሪክ አገልግሎት ደረጃውን የጠበቀና ወቅቱን ያገናዘበ የቴክኖሎጂ ስልጠና ማዕከል ለማስገንባት የሚያስችለውን የመግባቢያ ስምምነት ከኢትዮጵያ ኮንስትራክሽን፣ ዲዛይንና ሱፐርቪዥን ስራዎች ኮርፖሬሽን ጋር ዛሬ ጥቅምት 03 ቀን 2012 ዓ.ም በተቋሙ መሰብሰቢያ አዳራሽ ተፈራርሟል፡፡2

ሁለቱን ተቋማት ወክለው የመግባቢያ ሰነዱን የፈረሙት የኢትዮጵያ ኤሌክትሪክ አገልግሎት ዋና ስራ አስፈጻሚ አቶ ሽፈራ ተሊላና የኢትዮጵያ ኮንስትራክሽን፣ ዲዛይንና ሱፐርቪዥን ስራዎች ኮርፖሬሽን ዋና ስራ አስፈጻሚ ዶ/ር ኢንጂነር ነገደ አባተ ናቸው፡፡2

የቴክኖሎጂ ስልጠና ማዕከሉ ግንባታ በሁለት ምዕራፍ ተከፍሎ የሚከናወን ሲሆን፤ በምዕራፍ አንድ የግንባታ ጥናትና የዲዛይን ስራዎች፣ በምዕራፍ ሁለት የህንጻ ግንባታ ቁጥጥር እና የውል አስተዳደር ስራዎች የሚከናወኑ ይሆናል፡፡

የስልጠና ማዕከሉ ግንባታ የሚከናወነው አዲስ አበባ ኮተቤ በሚገኘው 16.9 ሄክታር መሬት ላይ ነው፡፡ ግንባታው የሚከናወነው የከተማውን ህግና የህንጻ ግንባታ ስታንዳርድ እንዲሁም ማስተር ፕላን መሰረት በማድረግ መሆኑንም በፊርማ ስነ ርዓቱ ወቅት ተገልጿል፡፡3

የማዕከሉ ሕንጻ ግንባታ አጠቃላይ ወጪ በአማካሪ ማሀንዲሱ ጨረታ ከወጣ በኋላ የሚወሰን ሲሆን፤ የማዕከሉ ማስተር ፕላን ለማዘጋጀት፣ ለዲዛይንና ኮንትራት አሰተዳደር ሥራዎች ከ37 ሚሊዮን ብር በላይ ወጪ ይደረግበታል፡፡

የቴክኖሎጂ ማዕከሉ የመማሪያ ክፍል፣ የአስተዳደር ህንጻ፣ ቤተ-መፅሐፍት፣ የምርምርና የልህቀት ማዕከል፣ መኝታ ቤቶች፣ ልዩ ልዩ የስፖርት ማዘውተሪያ ሜዳዎችና የዲስትረቢውሽን ስራዎች ሰርቶ የሚኖረው ይሆናል፡፡

የኢትዮጵያ ኤሌክትሪክ አገልግሎት ዋና ስራ አስፈጻሚ አቶ ሽፈራ ተሊላ በፌርማ ስነ-ስርዓቱ ላይ የሚገነባው  የስልጠና ማዕከል ተቋሙ የጀመራቸውን የለውጥ ስራዎች በቴክኖሎጂ በመደገፍ የተቋሙን አገልግሎት አሰጣጥ ቀልጣፋ፣ ጥራት ያለውና አስተማማኝ ለማድረግ፣ የአቅም ውስንነቶችንና የመረጃ ከፍተቶች ለመሙላት ጉልህ ሚና ይኖረዋል ብለዋል፡፡

ዋና ስራ አስፈጻሚው አክለውም የኦፕሬሽንና የቢዝነስ ስራዎችን ለማቀላጠፍ፣ የከፍተኛ ቮልቴጅ እቃዎችን ጥራት ለመፈተሽና ለማረጋገጥ፣ የዲስትረቢውሽን መስመሮችን ለመቆጣጠር የሚያስችል ስካዳ ሲስተም ተግባራዊ ለማድረግም ከፍተኛ ጠቀሜታ እንዳለው ተናግረዋል፡፡

የኢትዮጵያ ኮንስትራክሽን፣ ዲዛይንና ሱፐርቪዥን ስራዎች ኮርፖሬሽን ዋና ስራ አስፈጻሚ ዶ/ር ኢንጅነር ነገደ አባተ በበኩላቸው የስልጠና ማዕከሉ አቅም ያላቸው ባለሞያዎችን ለመፍጠር የሚያስችልና ለሌሎች ተቋማትም ማሳያ በመሆኑ በተያዘለት ጊዜ ለማጠናቀቅ በትኩረት እንደሚሰሩ ተናግረዋል፡፡ 

የስልጠና ማዕከሉ ግንባታ የጥናትና የዲዛይን ስራዎችን ሙሉ ለሙሉ ከተጠናቀቁ በኋላ የሚጀመር መሆኑን በፊርማ ስነ ስርዓቱ ተጠቁሟል፡፡