ተቋማችን ለሀገራችን ኢኮኖሚያዊና ማህበራዊ ዕድገት ጀርባ አጥንት የሆነውን የኤሌክትሪክ ኃይል በመላ ሀገሪቱ በአስተማማኝ፣ ተደራሽና ቀጣይነት ባለው መልኩ ለማቅረብ ዘርፈ ብዙ ሥራዎችን በቁርጠኝነት እየፈጸመ ይገኛል።

እንደሚታወቀው የኤሌክትሪክ ኃይል ለሁለንተናዊ ዕድገታችን መሠረት ቢሆንም፣ በሥራ ሂደትና በአጠቃቀም ወቅት በሚፈጠሩ ስህተቶች፣ እንዲሁም የሥራ ላይ ደህንነት መመሪያዎችንና መሳሪያዎችን በአግባቡ ባለመጠቀም የተነሳ ከቀላል እስከ ከባድ የንብረትና የአካል ጉዳቶች ሊከሰቱ ይችላሉ። ከዚህም በላይ የሰው ሕይወት ሊጠፋ ይችላል።

​ስለዚህ በቤትዎም ሆነ በሥራ ቦታዎ የኤሌክትሪክ ደህንነትን ማረጋገጥ ምርጫ ሳይሆን የሁላችንም የማይታለፍ ግዴታ ነው ብለን እናምናለን።

​እንደ ኃይል አቅራቢ ተቋም፣ በምናከናውናቸው የኃይል ማከፋፈልና ጥገና ሥራዎች ሁሉ የሠራተኞቻችንን ብቻ ሳይሆን የክቡራን ደንበኞቻችንን እና የህብረተሰቡን ደህንነት መጠበቅ ዋነኛ ኃላፊነታችን ነው።

ከዚህም በላይ ደንበኞቻችን በየቤታቸውና በየድርጅቶቻቸው ከኤሌክትሪክ አደጋ ራሳቸውን እንዲጠብቁ የማስተማርና የማስገንዘብ ሥራዎችን በልዩ ትኩረት እየሠራን እንገኛለን።

“ቅድሚያ ለደህንነት” የሚለው መርህ በተቋማችን ብቻ ሳይሆን በእያንዳንዱ ደንበኛችን ቤትና የሥራ ቦታ የእለት ተእለት ባህል መሆን አለበት።

​ይህንን ግንዛቤ ለማሳደግ ተቋማችን በየሦስት ወሩ የ“የሥራ ላይ ደህንነት ንቅናቄ ሳምንት” በማካሄድ፣ የአገልግሎት አሰጣጣችንን ከአደጋ የፀዳ እንዲሆንና የደንበኞቻችንን ደህንነት በላቀ ሁኔታ ለመጠበቅ የበኩሉን እየተወጣ ይገኛል። የዚህ ንቅናቄ ዋና ዓላማ እኛም ሆንን እናንተ ደንበኞቻችን ከትላንቱ በተሻለ ዛሬ ለኤሌክትሪክ ደህንነት ከፍተኛ ትኩረት እንድንሰጥ ነው።

​ይህንን ከአደጋ የፀዳ አካባቢ የመፍጠር የጋራ ግብ ለማሳካት፣ እናንተም ክቡራን ደንበኞቻችን በሚከተሉት ነጥቦች ላይ አጋር እንድትሆኑን እንጠይቃለን፦

👉በየቤታችሁና በየድርጅቶቻችሁ የሚገኙ የኤሌክትሪክ መስመሮችንና ዕቃዎችን በጥንቃቄ መያዝና አደጋ እንዳያደርሱ መከታተል፣

👉 ​በአካባቢያችሁ የወደቁ የኤሌክትሪክ ሽቦዎችን ወይም አደጋ ሊያስከትሉ የሚችሉ ሁኔታዎችን ሲመለከቱ በፍጥነት ለተቋማችን ማሳወቅ፣

👉 ​የሚተላለፉ የኤሌክትሪክ ደህንነት የጥንቃቄ መልዕክቶችንና መመሪያዎችን በተግባር ላይ ማዋል፣

👉 ​ሕገ-ወጥ የኤሌክትሪክ መስመር ዝርጋታዎችንና ግንኙነቶችን በመከላከል ራስዎንና ቤተሰብዎን መጠበቅ።

​ቅድሚያ ለደህንነት መስጠት ዛሬን በሰላምና በሕይወት እንድንኖር፣ ነገም በሥራችን ውጤታማ እንድንሆን የሚያስችለን መሠረታዊ ነገር ነው። ማንኛውንም የኤሌክትሪክ መሣሪያ ከመጠቀምዎ በፊት ለደህንነትዎ ቅድሚያ መስጠት የዘወትር ልማድዎ እንዲሆን ጥሪያችንን እናስተላልፋለን።

​በመጨረሻም፣ ከአደጋ የፀዳ የኤሌክትሪክ አጠቃቀምን ማረጋገጥ የሁላችንም የጋራ ኃላፊነት በመሆኑ፣ ከጎናችን ሆናችሁ አብራችሁን እንድትሠሩ በአክብሮት እጠይቃለሁ።
​አመሰግናለሁ!

​ኢንጂነር ጌቱ ገረመው
ዋና ሥራ አስፈፃሚ፣ የኢትዮጵያ ኤሌክትሪክ አገልግሎት

​