የኢትዮጵያ ኤሌክትሪክ አገልግሎት በአዲስ አበባ እና በክልል ከተሞች ያስገነባቸውን የኤሌክትሪክ ተሽከርካሪ ቻርጅ ማድረጊያ ጣቢያዎች አስመረቀ

የኢትዮጵያ ኤሌክትሪክ አገልግሎት በአዲስ አበባ እና በተለያዩ የክልል ከተሞች ያስገነባቸውን ዘመናዊ የኤሌክትሪክ ተሽከርካሪ ቻርጅ ማድረጊያ (የኃይል መሙያ) ጣቢያዎች ዛሬ በይፋ አስመርቋል።

በምረቃ ስነ-ስርዓቱ ላይ የተቋሙ ከፍተኛ የሥራ ኃላፊዎች፣ የትራንስፖርት እና ሎጂስቲክስ ሚኒስቴር ተወካዮች እንዲሁም ጥሪ የተደረገላቸው እንግዶች ተገኝተዋል። አዲስ የተገነቡት የኃይል መሙያ ጣቢያዎች በሀገሪቱ እየጨመረ የመጣውን የኤሌክትሪክ ተሽከርካሪዎች ቁጥር ተከትሎ የሚነሳውን የቻርጅ ማድረጊያ እጥረት በከፍተኛ ደረጃ እንደሚቀርፉ ተገልጿል።

የኢትዮጵያ ኤሌክትሪክ አገልግሎት ዋና ሥራ አስፈጻሚ በስነ-ስርዓቱ ላይ ባደረጉት ንግግር፣ ፕሮጀክቱ መንግሥት የነዳጅ ወጪን ለመቀነስ እና ለአካባቢ ተስማሚ የሆነ የአረንጓዴ ትራንስፖርት ሥርዓትን ለመገንባት የያዘውን ሀገራዊ ግብ ለማሳካት ወሳኝ ሚና እንዳለው ገልጸዋል። ጣቢያዎቹ ፈጣን (Fast Charging) እና መካከለኛ የኃይል መሙያ መሳሪያዎች የተገጠሙላቸው ሲሆን፣ በአንድ ጊዜ ለበርካታ ተሽከርካሪዎች አገልግሎት መስጠት የሚችሉ ናቸው።

ተቋሙ በቀጣይም ከግሉ ዘርፍ ጋር በመተባበር በዋና ዋና የሀገሪቱ አውራ ጎዳናዎች እና ተጨማሪ የክልል ከተሞች ተመሳሳይ የኃይል መሙያ ጣቢያዎችን የማስፋፋት ሥራውን አጠናክሮ እንደሚቀጥል አስታውቋል።